නිවැරදි ධර්මය සැමදා විද්‍යමාන නොවේ..... අධර්මයෙන් එය වැසීයමින් පවතී......
ඒ භාග්‍යවත් අරහත් සම්මා සම්බුදුරජාණන් වහන්සේට නමස්කාර වේවා !
5.3
සුප්පබුද්ධකුට්ඨි සූත්‍රය
~~~~~~~~~~~~~~~
සුප්‍රබුද්ධ කුෂ්ඨ රෝගියා වදාළ උදානය
මා හට අසන්නට ලැබුනේ මේ විදිහටයි . ඒ දිනවල භාග්‍යවතුන් වහන්සේ වැඩසිටියේ රජගහ නුවර ලෙහෙනුන්ගේ අභයභූමිය වූ වේළුවනාරාමයේ .
ඒ දිනවල රජගහ නුවර සුප්‍රබුද්ධ කියලා කුෂ්ඨ රෝගියෙක් හිටියා . ඔහු මිනිසුන් අතර ගොඩාක් දුප්පත් . මිනිසුන් අතර ගොඩාක් අවාසනාවන්තයි. මිනිසුන් අතර දීන කෙනෙක්.
එදා භාග්‍යවතුන් වහන්සේ තමන් වහන්සේව පිරිවරා ගත් විශාල පිරිසකට දහම් දෙසමින් වැඩසිටියේ .සුප්‍රබුද්ධ කුෂ්ඨ රෝගියාත් සෙනඟ රැස් වෙලා ඉන්න හැටිදුර දීම දැක්කා .දැකලා ඔහුට මෙහෙම හිතුනා .
"නොවැරදීම මෙතැන නම් මොනවාහරි කන බොන දෙයක් බෙදන තැනක් වගෙයි . මමත් ටිකක් ඒ පිරිස ළඟට කිට්ටු කරන්න ඕන. එතකොට ඔය කන බොන දේවල් මොනවා හරි මටත් ලැබෙන්නෙ නැතැයි " කියලා .
ඉතින් සුප්‍රබුද්ධ කුෂ්ඨ රෝගියා ඒ රැස් වුන සෙනඟ ළඟට කිට්ටු වුනා. එතකොට එහි සුප්‍රබුද්ධ කුෂ්ඨ රෝගියාට දකින්නට ලැබනේ භාග්‍යවතුන් වහන්සේ තමන් වහන්සේව පිරිවරා ගත් විශාල පිරිසකට දහම් දෙසමින් වැඩ ඉන්න ආකාරයයි . දැකලා ඔහුට මෙහෙම හිතුනා . 'ආ! මෙතන කන බොන දේවල් බෙදන තැනක් නොවෙයි . මේ ශ්‍රමණ ගෞතමයන් වහන්සේ පිරිසකට දහම් දෙසනවා නෙ .මමත් එහෙනම් , බණ ටිකක් අහන්න ඕන .' ඔහුත් පැත්තකින් වාඩි වුනේ 'මමත් බණ අහනවා , මමත් ධර්මයට සවන් දෙනවා ' කියලයි .
එතකොට භාග්‍යවතුන් වහන්සේ එතැන උන් පිරිසේ සෑම දෙනාගේම සිත් තම සිතින් විමසා බලා වදාළා . 'මෙතැන ධර්මය අවබෝධ කරන්නේ කවුද? ' කියලා . ඒ පිරිස අතර වාඩි වෙලා සිටිය සුප්‍රබුද්ධ කුෂ්ඨ රෝගියාව භාග්‍යවතුන් වහන්සේ දැක වදාළා . දැකලා මෙහෙම හිතුවා. 'මෙතැන ධර්මය අවබෝධ කරන්න සුදුසු කෙනා මෙයා තමයි ' කියලා .
ඉතින් කුෂ්ඨ රෝගී සුප්‍රබුද්ධ අරභයා අනුපිළිවෙළින් කථාව වදාළා . ඒ කියන්නේ දන් දීමේ අනුසස් ගැන කථාව , සිල් රැකීමේ අනුසස් ගැන කථාව , සුගතියේ ඉපදීම ගැන කථාව , කාමයන් නිසා විඳින දුක් ගැන කථාව , කෙලෙස් නිසා සිත පිරිහීම ගැන කථාව , කෙලෙසුන්ගෙන් නිදහස් වීමේ අනුසස් වදාළා . එතකොට සුප්‍රබුද්ධ කුෂ්ඨ රෝගියාගේ සිත හොඳට සකස් වෙලා , මෘදු වෙලා නීවරණ පහවෙලා , ඔද වැඩී ගිය ප්‍රසන්න සිතකින් යුක්ත වෙලා සිටින මොහොත භාග්‍යවතුන් වහන්සේ දැක වදාළා. එතකොට බුදුවරයන් වහන්සේලාගේ සාමුක්කංසික ධර්ම දේශනාව වන 'දුක, සමුදය , නිරෝධ, මාර්ග' යන චතුරාර්ය සත්‍ය වදාළා . කළු පැල්ලම් නැති පිරිසිදු වස්ත්‍රයකට සායම් පොවන කොට , ඉතා හොඳින් ඒ සායම් උරාගන්නවා වගේ , කුෂ්ඨ රෝගියාටත් තමන් සිටි තැනදීම 'හේතුන්ගෙන් සකස් වූ යම් දෙයක් ඇත්නම්, ඒ හැම දෙයක්ම නැතිවීමෙන් නැතිවෙලා යන ස්වාභාවයෙන් යුක්තයි' කියන කෙලෙස් රහිත, අවිද්‍යා මළකඩ රහිත දහම් ඇස පහළ වුනා .
ඉතින් ධර්මය දැකපු , ධර්මයට පැමිණුන, ධර්මය දැනගත් , ධරමයේ බැසගත්, සැකයෙන් එතෙර වුන, අවිශ්වාසයෙන් බැහැර වුන, ධර්මය තුළ විශාරද බවට පැමිණුන , ශාස්තෘ සාසනය තුළ ස්වාධීනත්වයට පත් වුන, ඒ සුප්‍රබුද්ධ කුෂ්ඨ රෝගියා භාග්‍යවතුන් වහන්සේ ළඟට ඇවිදින් ආදරයෙන් වන්දනා කළා. පැත්තකින් වාඩි වුන සුප්‍රබුද්ධ කුෂ්ඨ රෝගියා භාග්‍යවතුන් වහන්සේට මෙහෙම කිව්වා .
"ස්වාමීනී , ඉතාම සුන්දරයි! ස්වාමීනී , ඉතාම සුන්දරයි! යටිකුරු වෙච්ච දෙයක් උඩුකුරු කළා වගෙයි. වහලා තිබුණු දෙයක් ඇරලා පෙන්නුවා වගෙයි . මංමුළා වූ කෙනෙකුට නොවරදින මග කිව්වා වගෙයි . ඇස් ඇති උදවියට රූප දකින්න අඳුරේ තෙල් පහන් දැරුවා වගෙයි . ඒ විදිහට භාග්‍යවතුන් වහන්සේ නොයෙක් අයුරින් ශ්‍රී සද්ධර්මය වදාළා . ස්වාමීනී , ඒ මම භාග්‍යවතුන් වහන්සේව සරණ යනවා . ශ්‍රී සද්ධර්මයත් සරණ යනවා . භික්ෂු සංඝයාත් සරණ යනවා. භාග්‍යවතුන් වහන්සේ අද පටන් මාව දිවි ඇති තුරාවට තෙරුවන් සරණ ගිය උපාසකයෙක් හැටියට පිළිගන්නා සේක්වා !"
එතකොට භාග්‍යවතුන් වහන්සේ දහම් කථාවෙන් සුප්‍රබුද්ධ කුෂ්ඨ රෝගියාට කරුණු දැක්වූවා. සමාදන් කෙරෙව්වා . උත්සාහවත් කෙරෙව්වා . සතුටු කෙරෙව්වා . ඔහු භාග්‍යවතුන් වහන්සේ වදාළ දෙය සතුටින් පිළිඅරගෙන අනුමෝදන් වුනා . සිටි තැනින් නැගිට්ටා . භාග්‍යවතුන් වහන්සේට ආදරයෙන් වන්දනා කළා . ප්‍රදක්ෂිණා කළා . ඉතින් සුප්‍රබුද්ධ කුෂ්ඨ රෝගියාට වැඩි දුරක් යන්න ලැබුනේ නෑ . අලුත වැදූ වහුපැටියෙක් ඇති ගව දෙනක් අඟින් ඇනලා ඔහුව මරලා දැම්මා .
ඉතින් බොහෝ භික්ෂූන් වහන්සේලා භාග්‍යවතුන් වහන්සේ ළඟට ගියා . ගිහින් ආදරයෙන් වන්දනා කරලා , පැත්තකින් වාඩි වුනා . පැත්තකින් වාඩි වුන ඒ භික්ෂූන් වහන්සේලා භාග්‍යවතුන් වහන්සේගෙන් මෙහෙම ඇහුවා .
"ස්වාමීනී, භාග්‍යවතුන් වහන්සේ විසින් දහම් කරුණු කියා දීපූ, සමාදන් කරවපු , උනන්දු කරවපු , සතුටු කරවපු අර සුප්‍රබුද්ධ කියන කුෂ්ඨ රෝගියා මරණයට පත් වුනා . එයා ඉපදුනේ කොහෙද ? එයාගේ පරලොව මොකක්ද ?"
"පින්වත් මහණෙනි , ඔය සුප්‍රබුද්ධ කුෂ්ඨ රෝගියා හරිම බුද්ධිමත් . ධර්මානුධර්ම ප්‍රතිපදාවට බැසගත්තා. ධර්ම කරුණු මුල් කර ගෙන මාව මහන්සි කළේ නෑ . පින්වත් මහණෙනි , සුප්‍රබුද්ධ කුෂ්ඨ රෝගියා සංයෝජන තුනක් ප්‍රහාණය කරලා සෝතාපන්න වුනා . කවදාවත් ආයෙ අපායෙ වැටෙන්නේ නෑ .නියත වශයෙන්ම නිවන අවබෝධ කරගන්නවා ."
මෙහෙම වදාළ විට , එක්තරා භික්ෂුවක් භාග්‍යවතුන් වහන්සේ ගෙන් මෙහෙම ඇහුවා .
"ස්වාමීනී, ඔය සුප්‍රබුද්ධ කුෂ්ඨ රෝගියා අන්ත දිළිඳු මනුස්සයෙක් . අන්ත අසරණ මනුස්සයෙක් . අන්ත දීන මනුස්සයෙක්. ඒකට හේතුව මොකක්ද ?"
"පින්වත් මහණෙනි , ඕක ගොඩාක් ඉස්සර සිදු වෙච්ච දෙයක් . ඒ කාලෙ ඔය සුප්‍රබුද්ධ කුෂ්ඨ රෝගියා මේ රජගහ නුවර සිටු පුත්‍රයෙක්. දවසක් එයා උයන් බිමට යද්දී , නගරයට පිඬුසිඟා වැඩලා හිටිය 'තගරසිඛී' කියන පසේ බුදුරජාණන් වහන්සේව දැක්කා .දැකලා මෙහෙම හිතුවා . 'ම්...! සිවුරකින් ඇඟ වහගෙන ඉන්න මේ කුෂ්ඨයා කවුද ? ' මෙහෙම හිතලා නින්දා අපහාස කරලා එතැනින් ගියා . ඒ කර්ම විපාක නිසා බොහෝ වර්ෂ ගණනක් , බොහෝ වර්ෂ සිය ගණනක් , බොහෝ වර්ෂ දහස් ගණනක් , බොහෝ අවුරුදු ලක්ෂ ගණනක් ඔහු නිරයේ පැහුනා. ඒ කර්මයේ ඉතිරි විපාකයෙන් තමයි මේ රජගහ නුවරම එයා අන්ත දිළිඳු වෙලා , අන්ත අසරණ වෙලා , අන්ත දීන වෙලා ඉපදුනේ . දැන් ඔහු තථාගතයන් වහන්සේ වදාළ ධර්ම විනයට පැමිණිලා , ශ්‍රද්ධාව ඇති කරගත්තා . සිල්වත් වුනා . ධර්ම ඥානය ඇති කරගත්තා . ත්‍යාග ගුණය ඇති කරගත්තා . ප්‍රඥාවන්ත වුනා . ඔහු තථාගතයන් වහන්සේ වදාළ ධර්ම විනයට පැමිණිලා , ශ්‍රද්ධාව ඇතිකරගෙන , සීලය ඇති කරගෙන , ශැතවත් බව ඇති කරගෙන , ත්‍යාග ගුණ ඇති කරගෙන , ප්‍රඥාව ඇති කරගෙන , කය බිඳිලා මැරුණට පස්සේ සුගතිය නම් දෙව්ලොව උපන්නා. තව්තිසා දෙවියන් අතර උපන්නා . ඔහු ඒ දෙව්ලොවදී අනිත් සියලු දෙවියන් අභිබවා, රූපයෙනුත්, කීර්තියෙනුත් බබලනවා."
ඉතින් භාග්‍යවතුන් වහන්සේ මේ කරුණ දැනගෙන , ඒ වෙලාවේ මේ උදානය වදාළා .
"ඇස් පෙනෙන කෙනා අනතුර හඳුනාගෙන විසම මාර්ගය බැහැර කරලා දානවා වගෙයි,බුද්ධිමත් කෙනා ඇඟේ පතේ වීරිය තියෙන කාලෙ , මේ ලෝකෙ තියෙන පව් බැහැර කරන්න ඕන."
සාදූ ! සාදු !! සාදූ !!!
ක්ෂණසම්පත්තිය සහිත උතුම් මනුෂ්‍ය ආත්මයක් ලැබී ඇති මෙම බුද්ධෝත්පාදන කාලය තුළ කුසල් දහම්හි නිරත වී සසරෙන් එතෙරව ලබන සදාකාලික නිවන් සුව ලබාගැනීමට මේ උතුම් ධර්ම දානය හේතුවාසනා වේවා!
සියළු දානයන් අතර ධර්ම දානයම අග්‍ර වන්නේය . මෙම සදහම් පණිවිඩය සියලු දෙනා අතර බෙදාහැර (share) ධර්ම දානමය උතුම් පුණ්‍යකර්මයට ඔබත් දායක වන්න.
තෙරුවන් සරණයි!
( සූත්‍ර පිටකයට අයත් බුද්ධක නිකායේ උදාන පාළි 5, සෝණ වර්ගය )
¤☸¤══════¤☸¤☸¤══════¤☸¤
